Puru 'a "scuzzètta", pezzu prilibbàtu,

s'a spàrtunu 'nta barca 'i piscatùri:

'a pôi truvàri si ssî  raccumannàtu,

oppùru si facìsti un gran favùri.

Si t'arritròvi 'nta 'ssi furtunàti,

fatti 'na delicàta ghiotticèdda:

dû  càppiri di Lìpari, salàti,

'n'alìva di sammùra e 'a cipuddèdda.

Tuttu dusàtu, senza esaggeràri,

tèniti arrèti cu li cundimènti,

làssicci 'u gustu chi ci desi 'u mari;

e statti attèntu alli svenimènti!

Discùssu a parti fa lu "cutagghiùni";

'ssa parti la truvàmu facilmènti,

'a genti non s'accàtta, havi raggiùni,

c'è pocu 'i masticàri sutta ê denti !

Ma si t'abbàsta l'arma di pruvàri,

fattìllu cull'agghiùzzu e 'u pumadòru:

â marinàra inzòmma l'hâ manciàri;

e dopu cunta 'i morti quantu foru !

Ora arristàu ‘u pisci tuttu sanu;

centu chilàzzi ‘i pisci ittàtu ddà;

'a genti fa signàli cu la manu

p'avìri un mossu di "felicità".

Comùnqui non è tuttu di ittàri,

ci sunnu ancòra parti ginirùsi;

gustùsi puru, si sapùti fari:

robba pi li famìgghi numirùsi.

"Caciucavàllu": prima d'u buddìcu,

aùnni lu lattùmi s'allucàu;

è un pezzu duci e tènniru vi dicu,

fossi 'u chiù tènniru pezzu ch'arristàu.

Ci'hâ diri:- Pi favùri, giovanòttu,

siccòmu ora semu tutti espètti,

tàgghilu finu e non ci'annàri stottu,

sinnò non mali pi li cutulètti -.

 E chiddu t'arrifìla quattru mmossa

chi pìsunu di chiù d'un quartarùni,

e quannu 'rrivi a casa pigghi 'a scossa:

t'assùmma 'u tremulìzzu e lu matrùni.

Pacènza! Chista è sorti 'i cumpratùri;

non c'è difìsa contru  ô putiàru!

'Nta 'ddu mumèntu ti passàu l'amùri

e penzi chi di novu ti frigàru.

Ora turnàmu ô nostru, amìcu beddu;

di tuttu 'ddu gran pisci chi purtàru,

arrèsta 'a "surra": tagghiànnu c'u cutèddu

scinnènnu sùbitu sutta d'u cuddàru.

P'u tàgghiu 'i 'ssu resìduu ci voli

cutèddi fini e 'na manùzza bona;

chissu è ‘u tàgghiu pròpria d'i braciòli:

robba chi lu nnimìcu ti perdòna!

E ora arrèsta chiddu chi la genti,

(parru d'u missinìsi, 'ddu minchiùni),

chiama la "rota", chi non vali nenti,

e va di lu buddìcu  ô cutagghiùni.

Chissa è la parti ignòbili d'u pisci !

Dura, stuppùsa, e senza un filu 'i rassu:

sunnu cinquànta chili, mi capìsci ?

Iò quannu arrèsta chidda, vardu e passu.

Però, si la disgràzia t'assicùta

e a li parènti non pôi fari tortu,

daccìlla 'nto carbùni 'na studdùta,

s'annùnca sapi suli 'i pisci mortu !

M'arricumànnu pi lu sammurìgghiu:

faccìllu càrricu di erbi e di sapùri;

l'ògghiu d'alìvu vèrgini è lu mègghiu,

pi fari suppurtàbbili 'u dulùri!

 Ora sugnu sicùru t'apprisènti

'nto storu di lu pisci a Ferragòsto

e pi ti dari tonu ammènzu â  genti,

ci cerchi 'a "rota" - Un chilo per arròsto !!!! –