- Un ghiornu Canibardi,
chi non avia cuffari,
decisi ch'a Sicilia
s'avia a libbirari -.

- Com'era 'ssu puliticu ?
A cû appartinia ?
Vutava p'a sinistra
o p'a dimocrazia ? -

- Chi c'entra la pulitica!
Era un gran ginirali;
un omu chi pinzava
a un munnu libbirali!

Tempu 'na para 'i iorna
ni cumminau millanta,
di genti ginirusa
e pi la guerra pronta.

Di ora, 'mpari Cicciu,
ncumincia 'a vera storia,
aunni la Sicilia
si cummigghiau di gloria!

Picchi si cumminaru,
di milli ca parteru,
chiussai d'i cani 'i Brasi:
n'esèrcitu daveru !

N'esercitu, cumpari,
armatu a puntinu:
furcuni, accetti, pali,
e quarchi timpirinu.

Chistu p'avi ri idea
di quali gran cicruni,
si stava rivirsannu
d'incoddu a li burbuni !

- Tutti a Calatafimi...
n'aspetta Canibardu;
picciotti, avemu a cùrriri,
sinnò facemu tardu...-

E quannu finalmenti,
'rrivaru 'nto zappatu,
già li cummattimenti
avi unu 'ncuminciatu.

Vulàvunu crisòmmuli
e baddi di cannuni;
àutru ch'accetti, pali
e mànichi 'i furcuni!

- Picciotti accuminciamu!
Tiramu fora 'u cori!
Chi ccà si fa l'Italia,
oppuru ccà si mori! -

'A trumma già sunava
la càrica 'i seicentu,
e 'ddi picciotti arditi
parteru comu ô ventu.

Accù muddava petri,
accù curpazzi 'i lignu,
cû corpi di sciunetta
chi n'arristava 'u signu.

Appena li burbuni
'i vi ttiru opirari,
non foru chiù sicuri
di puticcilla fari.

E ni mureru tanti,
dill'una e l'àutra parti !
E tutti figghiuleddi,
curpiti dalla sorti.

Ci foru tanti eroi,
'a storia li riporta:
accù ci'annau ritta,
accù ci'annau storta.

A' fini 'i 'ddu cunfrittu,
e prima d'a scurata,
l'esèrcitu burbùnicu
batti u in ritirata.

Lassau li sô cannuni
supra alli muntarozza:
e s'i vuliti vi diri,
sû esposti 'nta 'dda piazza.

Chista è la vera stòria
di la Sicilia libbira!

L'Italia era unita
sutta di 'nu riami;
ma 'nta Sicilia, 'mpari,
cuntinuàu la fami!

'Na vota li burbuni,
'na vota i turcomanni,
e ora c'è la màfia
chi ni scutola 'i panni!

Quarcunu dissi un ghiornu,
o fossi lu pinzau:
- Ma a 'stu Canibardi,
cû cazzu lu prigau ? -