Alle porte del giudizio

Essennu ‘nficatàtu a puntu giustu

d’u munnu tintu mi pigghiài licenza,

prontu pi fari giusta pinitenza

s’ô ‘nfennu l’arma mei truvàva postu.

Ma essennu ‘a prima vota chi murìa,

‘nte quattru strati mi n’annài p’u rittu

e sbommicài ‘nto’n postu binidìttu

aùnni un vecchiu mi spittàva a mia.

SP - Cû sî? Di unni veni? Cû ti manna?

Io - Scusàti si diturbu - rispunnìa –

sicuramenti ccà sbagghiài putìa,

picchì ‘nta nìgghia l’arma non guvènna -

mi difinnìa cuntànnu ‘na panzàna

essennu troppu friscu di trapàssu;

ma chiddu mi pigghiàu cu lu sô vessu

e la minzògna mei non appi rana.

- Di quali nìgghia parri? Chistu è celu,

luntanu assài dill’acqua chi sbapùra,

attornu a nui è tutta ‘na friscùra:

ccà tuttu è trasparenti  e senza velu.

- Allura dintra all’occhi era la nìgghia,

ancòra chini dill’umàni eventi

chi stràmmunu a tal puntu ‘i sentimenti

chi l’omu non s’addùna p’unni pìgghia.

Cû sugnu? ‘N’animedda fora via,

vistu ch’attornu non si vidi fudda.

Di unni vegnu? Di unni cû si modda

non torna arreti mancu si vurrìa.

Mi manna cû ‘na vota mi mannàu,

patrùni toi e di ‘ssa to’ lucànna:

ciccànnu ad Iddu cunzumài la pinna,

ma non ci fu risposta e si negàu.

- Sapìssi quantu voti l’hâ sintùtu

‘sta tiritèra chi vai sbrocculànnu!

E’ storia vècchia quantu vècchiu è ‘u munnu:

si l’omu u cerca l’havi già truvàtu.

Cû sapi chi ssi spetta l’ominìcchiu!

Magàri un vippi tuttu ‘ncipriàtu,

un marcantòniu, ‘n’aciddàzzu alàtu,

o l’umbra stralunàta di ‘nu vècchiu,

‘na luci fotti, ‘na vuci senza ciàtu,

‘nu stròlicu chi parra dintra ô spècchiu,

un ghiattu niru chi cci scàccia l’òcchiu:

si l’omu u cerca l’havi già truvàtu!.

- E dalla cu ‘sta stòria! Mi cridìa,

parru d’antùra, quannu mi muddài,

ch’avìssi vistu chiddu chi ciccài:

picchìstu l’omu mori, si dicìa.

- Intantu non è dittu chi ti spetta;

cca intra trasi sulu l’animèdda,

picchìstu non vidìsti ‘na gran fudda:

c’è cû non strica mancu cu ‘sta potta.

- E p’unni pìgghia, chi mi sentu pessu?

- Pi unni ti cridìvi chi pigghiàvi;

picchì cû mori la cuscènza l’havi,

quannu si modda sapi già lu vessu.

- ‘Nta ‘ssa cuscènza, sugnu piccatùri.

Non sàcciu quantu voti iastimài,

â missa quasi sempri non ci’annài,

senza parràri poi dill’atti impùri.

S’avìssi avùtu ‘u tempu e la distrìzza,

l’ultimamenti, ‘nta ‘ddu munnu bruttu,

un motticèddu o dui l’avìssi fattu,

sicùru di iammàri ‘na prudìzza.

E pi ‘ssa cosa quantu piniài!

Ci foru notti ch’i passài chiancènnu

pi non avìri ‘a fozza d’u cumànnu:

e ancòra mottu non mi rassignài.

Pecciò drizzài la prua pi lu ‘nfennu.

E non mi pentu, no, di ‘sti pinzèri;

dammi la rutta, mi nni vògghiu annàri,

non sugnu degnu di ‘ssu Patretènnu.

- Chissi non sunnu boni sentimenti:

ancora potti scòccia ‘nta carìna.

Sugnu sicùru ch’ammenzu a la iastìma,

facìsti  straggi d’i cumannamenti.

- Non ci nn’è unu dintra a ‘ddu dittàtu

pill’omu d’oggi e di la sô ginìa;

chiuttòstu pari tutta fantasìa,

e non è sammu chi fu mai cantàtu.

- E stai sbagghiànnu! Ccà intra ci su’ genti

chi di ‘stu sammu, comu vai dicènnu,

nni fìciru bannèra contru ô ‘nfennu,

e di beàti foru fatti santi-.

- Chissi nascèru santi, iò mi penzu,

di ‘stu concòssu canuscìunu ‘a prova.

Fossi ‘sta cosa t’arrisùtta nova,

ma d’unni vegnu non nni fa cchiù sconzu.

- Lassàmu stari! Cùntimi di tia:

picchì ti senti tantu piccatùri?

Non cridu p’i iastìmi e l’atti impùri.

Chiddu chi è ‘nta testa ti firrìa.

Avìa ‘na barba ianca e sbapurùsa,

spannìa profùmu quannu si muvìa,

‘na strana essenza chi non canuscìa,

ch’avìssi fattu ‘nvìdia o’n ciuri î rosa;

parìa patrùni di ‘na gran saggìzza,

e di serenità facìa maretta

chi s’allaggàva di ‘dda potta apetta

e si piddìa luntànu fora chiàzza.

- Di la cuscenza mei sugnu tirànnu!

Vitti ‘u dulùri, ‘a fami, e m’allaggài

pinzànnu sulu a la casèdda mei:

picchìstu senza paci mi cundànnu.

- Si di ‘ssu tô piccatu sî tirànnu,

cu ‘sta cumàcca non ti pôi mmiscàri;

ccà trasi sulu cû non havi a dari,

cû desi senza avìri e senza ‘ngannu.

A vacci aùnni ora ti cumànnu,

si trovi postu e l’accoglienza giusta

cchiù d’un migghiàru d’anni non ti custa,

sempri s’a genti toi s’a fa prigànnu.

- E allùra non è postu unni mmiddàri,

picchì la genti mei mancu ci penza

essennu chi mai mai nni fu d’usanza:

c’è  ‘n’àutru postu aùnni pozzu annàri?

- Un postu ci sarìssi, unni ‘nchianànnu

avìvi fattu prua cu liggirìzza:

ma non sî omu degnu di ‘dda razza!

-E allùra unni?- ci spiài chiancènnu.

‘I làcrimi si fannu laggasìa

si scùrrunu davanti a ‘nu sagràtu:

- Non ci sarìssi un postu dedicàtu -

mi dissi ‘u vecchiu mentri rispunnìa

- Ti pozzu fari grazia di dû anni

facènnu finta chi non fusti mottu;

pìgghia p’arrèti, ìsiti d’u lettu,

e cu la storia toi fatti cchiù ranni-.

Così m’arricugghìa a ‘stu  pagghiàru

cu tanta vògghia di rimediàri,

però non sàcciu d’unni  hâ ‘ncuminciàri,

ch’u munnu d’a misèria è tarigghiàru!

A unu ci spiài, chi canuscìa,

d’un postu bonu aùnni putìa dari,

mi rispunnìu –Ma va, non ci pinzari,

semu paràti, penza sulu a tia-.

E chi cci cuntu a chiddu fra dû anni?

Chi l’omu cecca soddi a tutti ‘i banni?

Chi pi la carità c’è ‘na scadenza?

Chi dill’amùri si piddìu l’essenza?

Walter  Ignazio Preitano