Bannìa si voi vinniri

Forse la valorizzazione della nostra città dovrebbe cominciare proprio dal dare luce alla miriade di palazzi padronali che fiancheggiano le strade del centro storico, quasi tutti malridotti e occultati alla vista, piuttosto che dal recintare qualche sassolino informe, magari facente parte di qualche orrendo condominio dell’antica Roma.
Chi ha mai detto che la bellezza si misura in secoli?

Un ghiornu ‘i màggiu, caminànnu a peti

‘nta ‘na Missina senza furistèri,

mi vinni ‘nu suspìru e ‘stu pinzèri:

- Putìssi profumàri e inveci feti!-.

C’è cchiù culùri ammènzu a la mmunnìzza,

aùnni l’omu cci spreca ‘a fantasìa,

chi supra ê mura di ‘na mastra via

aùnni ‘u tempu cci fici ‘na curàzza.

Palazzi patrunàli ricamati

cu mmanu fina e ògghiu di cazzòla

(unni l’antìchi nni facìunu scola)

cu ciùri, cu merletti e culunnàti,

pi la virgògna pàrunu ‘mmucciàti.

E cchiù camìni e cchiù ti nni cumpàri!

E ‘a meravìgghia ti fa cumminàri

ancòra ‘sti pinzèri suspiràti:

- C’è ‘na Missina antìca chi non pari,

chi muta muta si cunzùma e mori;

c’è ‘na Missina chi fa malucòri

picchì cû l’amministra havi chiffàri -.

Si poi, scavànnu spunta un mazzacàni

chi pari, fossi, appartinìu alla stòria,

allùra: - Femmi tutti! E’ la memòria

chi ‘sta città fu schiava d’i romàni!

E’ ‘na pretèsa ch’i peloritàni

di ‘sta Missina bedda chi non ‘ssumma,

pi ‘ddi pitrùddi sònunu la trumma

e priatùni bàttunu li mani!

Bannìa si voi vìnniri, Missina,

chi robba nn’hai pi fari ‘a to’ figùra!

Lèvicci ‘i sivi supra di ‘ddi mura

e a ribba ô mari nètticci la rina.

Chi tempi foru chiddi d’u Vittòria

e ‘u lidu accantu Principi Amedèu!

‘I matri si scinnìunu l’addèu

e ‘u “strittu” ci’u pascìa cu la sô stòria.

Bannìa si voi vìnniri, Missina!

Rifatti ‘a ‘ula, iètta quattru schigghi,

ripìgghiti l’amùri d’i tô figghi,

e fai la paci cu la Madunnìna.

Walter Preitano
da Bannia si voi vinniri

www.colapisci.it