L’oru d'u mari

 

 

- Qual è ‘u mègghiu pisci di 'stu mari ? -
- Tuttu dipènni di comu l'hâ manciàri:
si ti voi fari 'na bella 'rrustitìna,
la carni di lu "Mupu" è sopraffìna!
"Dèntici", "Lùvuri" e "Sàrighi" di rocca,
si pìgghiunu lu postu chi ci'attòcca.
si invèci preferìsci la frittùra,
"Pèttini Surici" e "Sciabbachéddu", allùra !
Puru la "Custaddèdda" di lu Strittu
fa gran figùra ammènzu ô pisci frittu.
Si poi ti spila 'u cori p'u brudèttu,
"Lupu" e "Cipùdda" li mègghiu sû di cettu.
Ma s'u conquìbbusu non ghiètta a meravìgghia,
"Scòffini", "Buddàci" e "Lappirèddi" pìgghia!
Oppùru penzi pi ‘na bugghitìna?
'Ccatta 'u "Murùzzu" purtàtu d'a matìna!
Però, si la nuttàta non fu bona,
rimèdia cu 'na "Spìnula" nustràna.
Si stai 'ngagghiànnu pi 'na 'nzalàta 'i mari,
"Pruppu", "Iammirèddu" e "Calamàri" !
Stattèntu mi sû vivi e ciaurùsi,
annùnca peddi l'ògghiu e l'àutri cosi -.
- E tuttu l'àutru pisci di lu "Strittu":
'u "Sàuru" 'a "Opa" 'a "Biàda" 'u "Pauròttu" ? -
- Sû tutti boni, quannu sunnu a ssummu,
ma non mmiscàri l'oru cu lu ghiùmmu!