Piscicola

Stu Piscicola era unu di lu Faru, ca di picciriddu 'un facia àutru chi stari a mari natannu di la matina fin'a la sira, picchi lu so geniu lu purtava ddà. So matri a riprinnillu, a 'mminazzallu , a 'ttaccallu, macari a pigghiallu cu li boni maneri; ma era tuttu 'nùtuli.

'Na jurnata, 'un ni putennu cchiù, si vota, povira donna! cu raggia di cori e cci dici:
- Chi putissi addivintari pisci e 'un 'sciri cchiù di l'acqua!

E comu dissi accussì, stu picciriddu addivintau cu la peddi 'na stampa chidda di lu squatru, e 'mmenzu li jita cci crisciu la pidduncia tal' e quali li pedi di l'anitri.
D'allura in poi, terra stu picciriddu 'un ni vitti cehiù, cà la so terra era lu mari, e natava e abbuddava megghiu d'un pisci: e pi chissu cci misiru Piscicola, cà di battisimu si chiamava Cola.

(1)

Ogni jornu si jittava, 'nt' ò Portu di Missina, pi divirtìrìsi.
Vinni a Missina lu Re, e cci cuntaru ca cc'era st'omu purtintusu, chi stava a mari comu un pisci. Lu Re ccì vosi cridiri 'n principiu, tantu ca lu chiamau a la prova, e cu 'na lancia riali si lu purtò a lu Garofalu, a lu Faru; e cci dissi:
- Ccà cc'è sta coppa d'oru; iò ti la jettu a mari; si tu ddoppu un'ura la va' a trovi, è tua.

Chiddu aspittau un'ura, e si jittau 'u funnu; ddoppu du' uri assummau cu la coppa d'oru ê manu.
Lu Re cci dumannau ch'avia vistu 'nta lu funnu di lu mari, e Cola cci dissi ca cc'eranu dui grannissimi caverni, chi sucavanu l'acqua di lu mari, e avevanu comunicazioni cu lu Muncibeddu.

Ddoppu jorna, prima di pàrtiri, lu Re lu chiamò arreri, e cci dissi:
- Iò ti jettu 'n'âtra coppa d'oru cchiù granni di la prima, a pattu ca tu ha 'a vìdiri sina unni arrivanu sti caverni.

Rispunni Cola:
- Maistà, si

Lu 'nnumani matina lu Re iju supra locu; jittò a mari la coppa; ddoppu du' uri si jittò Piscicola, e finu a st'ura s'aspetta chi torna 'n summa.

Termini
Raccolta da mio fratello Antonio dalla bocca di Vito Guardalobene, pescatore
Riportata da Giuseppe Pitrè
Studi di Leggende popolari in Sicilia
La Leggenda di Colapesce
1904