Na ota a Missina ci fu na matri ki avia un figghiu di nomi Cola. Stu carusu stava tuttu lu jornu a mari, e sso matri a bushiari:
- Cola! Cola! Veni n terra ma ti pari chi ssi pisci? - E iddhu a natari sempri chiu' luntanu, ch' a povira matri si dannava a taliallu.
Un gnornu era tantu avviluta e stanka di ushiari e dispirarisi, ki cci mannau na malidizioni:
- Cola! Aiss' a ddivintari veru un pisci!
Ssu jornu i porti ru shelu avian' a essiri aperti, picki' a malirizioni di corpu s'avvirau, e iddhu si ntisi veru com' un pisci. Ci cariu ri n kori ogni affettu pi kiddhi ri n terra, e ssi rapiu nmeshi pi kiddhi ch' eranu a mari. E ddha arristau.

Ne notti ascutava i respiri e i risati ri ninfi marini kull' occhi beddhi com' e stiddhi. Jia appressu e sireni ch' u corpu com' i derfini, e cci sciddhicavanu ri n mezz' e vrazza. N funn' o mari, stava nkantatu ar ascutari i so canti n mezzu e jardina di curallu e l'accumpagnava ne saluna di cristallu unn' abbitavanu e abballavanu.
Addivintau forti e beddhu, e natava com' un pisci. I piscatura u canuscianu e u chiamavanu Colapisci. E a so fama si spanniu pi tutta l' isula ra Sishilia.
A vushi ch' a mari c' era n' omu ch paria un pisci, arrivau finu o re Federicu, ki urdinau a tutt' i marinara di riricci, kuannu u virianu, ki u re ci vulia parlari.

Un gnornu un piscaturi, jennu o largu ca varca, s' u vitti natari vishinu.
- Cola! - ci rissi - c'e' u re a Missina ki voli viriri comu nati, e havi cosi r'addumannariti!

Cola si prisintau e fu arrishivutu ru re, ki cci rissi:
- Cola Pisci, tu chi ssi accussi' bravu a natari aviss' a fari u giru di tutta l' isula ra Sishilia, e dirimi unn 'e' chi u mari e' chiu' funnutu, e ssoccu si viri!

Colapisci ubbidiu e ssi misi a natari n tunnu a Sishilia.
Kuannu turnau u re ci addumannau socc' avia vistu. E iddhu rissi ch' avia vistu muntagni, vaddhuna e kaverni, e tutti cosi posati supra' a tri kulonni, una sutta a ogni punta ra sishilia:
- Ma sutta Missina mi scantai picki' u funnu unn zi viri.- O re ci vinni un pinzeri ch' unn ci rava pashi. Vulia sapiri soccu c' era sutta, e unni s' appuiava Missina.
- Ha ghiri dha sutta a taliari, e mi rishi soccu viri.

Cun tuttu chi si scantava Colapisci si fishi curaggiu:
- Maista', vitti soccu vitti e mi scantu, ma ubbidisciu a vussignoria.- E ssi jittau.

Mankau un gnornu, e kuannu turnau a galla era pallidu e scantatu mortu.
- Soccu viristi, Cola? - Ci addumannau u re.
- Sugnu scantatu mortu picki' sutta Missina vitti na culonna ki e' ciaccata. Ri n funnu acchiana accua nmiscata cu fumu. Scinnivi, scinnivi, ma u funnu unn u vitti.

O re ci vinni na prioccupazioni, e vulia sapiri soccu c' era sutta sta punta ra Sishilia.
- No, Maista', dhocu unn mi jettu chiu', mi scantu.

Unn arriniscennu a kummincilu, u re si livau a curuna ch' avia n testa, tutta fatta r'oru e brillanti, e a jittau a mari.
- Cola, va pigghiala!
- Ma chi ffishi, Maista'! A curuna ru regnu!
- Curuna,  ch' unn ci nn' e' nautra o munnu.- Rissi u re. - Cola, l' ha gghiri a pigghiari!
- S' accussi' voli vussignuria, scinnu n funnu a pigghialla, ma u cori mi rishi ch'unn acchianu chiù. - E ssi jittau.

Cola pisci arristau n funn' o mari e unn acchianau chiù. N miritati iddhu unn' e' mortu.
Successi ki,  mentri scinnia sempri chiu' n funnu, s'addunau ch' a culonna Piloru, kiddha sutta Missina, ki gia' era tutta shaccata, si staia rumpennu pezza pezza, e subbitu l' agguantau e ci misi a spaddha sutta p' unn fari affunnari a Sishilia.
E accussi' arristau n funnu a mmari a teniri ch' a spaddha a culonna di capu Piloru.

S' hav' a sapiri chi kuannu c' e' terremotu vishinu o strettu, e' picki' Colapisci, stanku di teniri a punta ra Sishilia sempri cu na spaddha, si passa a culonna nall' autra spaddha, e kissu crea un muvimentu, ki a genti supra a terra ci pari terremotu.