'O pesce Nicolo'

Guaglione
d’’a pelle abbrunzata
ca sfile natanno
p’’o mare d’’o puorto;

Padrone,
cumanne a ‘vracciata,
t’avuote abbuffanno,
te miette a ffa’ ‘o muorto;

Stracquato
galligge gudenno,
ripuose tranquillo
pe’ ll’atu cammino;

Sfusato,
sparendo e apparenno,
spuntanno ‘o zampillo
me pare ‘o delfino.

Sta scorza
ca ll’acqua nun spogna
ch’è pelle squamata?
si’ figlio a ‘nu pesce?

Sta forza
ca ‘o friddo nn’arrogna,
chi mago t’’ha data?
stu sciato ‘a do’ t’esce?

Nun siente
ca jesceno pazze
da ‘e nnave e da e ‘vuzze
Strillanno “Vivò!”

Tu niente:
natanno te sguazze;
ca, quanno semmuzze,
faie quello che vvuo’.

Guaglione
D’’a pelle abbrunzata,
pur’io me menavo
p’’o mare d’’o puorto.

Raffaele Viviani
Poesie - 1936