Cumpari nto canali di Messina,
spittaculu cchiù raru e di biddizza
l'hannu chiamatu "Iride Mamertina";
finominu i natura e di stranizza.
U mari da Sicilia gonfia tunnu
e si trasforma a spigu di muntagna,
u mari da Calabria largu e funnu
traspari nu cristallu chi non bagna!
Supra i stu munti nu gran specchiu ntesta
cu pedi o Lidu a costa calabrisa,
na filarata di pilastri in festa
nni spunta na migghiara longa a rrisa.
Ancora e poi dumila, decimila,
tutti pricisi a stissa distanza
e du stissu chiaruri misi in fila
nto mentri nu chiaruri vivu avanza.
In arcu, tanti archi all'intrasattu
supra du mari immenzu e luccicanti
ppoggia nu corniciuni ttuttu smaltu
e supra assai casteddi di rignanti.
Ci sunnu tanti turri d'ogni stampu
chi scappunu nto menzu e culunnati,
facciati di finestri e poi nto llampu
alberi a milli a milli profumati.
Scumpari nta na vota chi piccatu
tutta sta meravigghia nmenzu o mari...
Un coppu i ventu e tuttu è passatu,
spittannu ancora chi pò riturnari.
Finominu di l'aria naturali
è la Fata Murgana surprindenti
ch'è sulu ccà a Messina nto canali,
tiatru d'un miraculu d'a genti.
