Serenata

Lu mari di lu strittu di Missina
è 'nnamuratu di ssa terra arcana:
ci chiacchiria d'amuri ogni matina,
tuttu lu jornu, e la nuttata sana...

Cci cunta, a ssa magnifica marina,
li dispiaciri so', la so' mmattana
e pirchì l'amuri, chi lu fa parrari,
è granni, pi com'è granni lu mari.

La sira, quannu addùmunu lu Faru,
Fata Morgana svigghia a li Sireni;
e cantanu, poi tutti, paru paru
-Terra d'amuri me'...., ti vogghiu beni


Ssu mari nnamuratu è un veru zitu:
javi lu mantu azzolu, di velluti;
e, orru orru di lu so' vistitu,
comu un merlettu biancu cc'è cusutu;

lu suli cu la luna, poi, d'unitu,,
cci fannu strisci d'oru e argentu urdutu;
pirchì si voli beddu apprisintari,
davanti di ssa so' zita, lu mari.

La sira, quannu addùmunu lu Faru,
Fata Morgana svigghia a li Sireni;
e cantanu, poi tutti, paru paru
-Terra d'amuri me'...., ti vogghiu beni


Ssu mari, chi si parti assai d'arrusu,
lassa a Cariddi ogni molestu pisu:
trasi a Missina bonu, a pirsuasu
che ddocu attrova Paci e Paradisu...

Missina è 'nfesta pi l'amatu casu,
cci adduma li lanterni e fa bon visu;
pirchì lu cori so', fattu p'amari,
è bonu, pi com'è bonu ssu mari.

La sira, quannu addùmunu lu Faru,
Fata Morgana svigghia a li Sireni;
e cantanu, poi tutti, paru paru
-Terra d'amuri me'...., ti vogghiu beni



Peppino Monforte Buttà

www.colapisci.it