È chista la tragedia di lu mari,
Cariddi mostru d'acqua 'nta lu strittu;
stu gran " Calofuru" chi fa scantari…
un gorgu tristu, indegnu, malidittu.
Di la Calabria ò Faru
sta mmucciata
e l'unni currunu comu saitti,
firriunu e si ntrizzunu a migghiara
i cchiù bastardi rèfuli fidditti.
È latra, è nfami, e Cariddi, è cruci
da nostra terra 'n menzu di lu mari
passa u tirruri e fa gh'jttari e buci;
sta sempri pronta contru e marinari.
Eppuru un gh'jornu propria li me' frati
'n menzu a la scuma sicchi ci ristaru
cu tutta a barca e foru sbranati…
intra ò "Calofuru" iddi nniaru.
Cerca la sciara a voli sta nfamuna
japrennu l'acqua ò funnu unn'è cchiù scura,
a tradimentu e a nuddu ci a pirduna…
sduvaca 'nbucca tuttu quannu è l'ura;
e piscaturi e nteri bastimenti
nto llampu s'ò purtatu 'n funnu o mari,
'n menzu a li pisci e l'unni tagghienti…
mai nuddu mai si lu po’ scurdari.
