Sicilia
![](immagini/daniele/Taormina.jpg)
Sicilia bedda, terra di li fati,
cu veni ccà di tia si nni ‘nnamura
jiettanu oru, ridennu, li cuntrati
a tuttu tempu urnati di virdura!
‘Na perla sì, ‘ngastata ‘nna tri mari:
lu nomu di Trinacria t’apparteni!...
E dd’unna chi ti vasa fa ammaliari,
ca cci cantanu ancora li sireni!
Lu focu vivu di li tò vulcani
a li tò figghi brucia ‘ntra li vini:
tutt’amuri li cori siciliani
di firi e d’ardimentu sunnu chini!
Sicilia, tutta zagara e splinnuri,
dialettu duci, musica chi ‘ncanta,
la storia vostra, sempri cu firvuri,
ad ogni cori lì so’ glorii canta!..
Caterina Daniele
![](servizio/home-nof.jpg)
www.colapisci.it
|