Lu pettu

1
Ntra ssu pittuzzu amabili,
Ortu di rosi e ciuri,
Dui mazzuneddi Amuri
Cu li soi manu fà.
 
Cci spruzza poi cu l'ali
Li fiocchi di la nivi;
'Ntriccia li viini e scrivi:
Lu paradisu è ccà
 
2
Ma un'importuna nuvula
M'ottenebra lu celo;
Appena 'ntra lu velu
'Na spirugghiedda cc'è.
 
Armata d'una spingula
Chi pari 'na laparda,
Modestia si lu guarda;
Ch'è rigurusa, ohìmè!
 
3
Un amurinu affabili
L'ammutta a jiri a mia;
Ma l'autru, oh tirannia!
Turnari poi lo fà;
 
Pietosu a li mei lagrimi,
Chiddu lu spinci arrerì;
Ma torna poi 'nnarreri,
E sempri veni e và.
 
4
Li sguardi si sammuzzanu
'Ntra dda spiragghia nica;
Ed idda li nutrica
Li pasci quantu pò.
 
ldda la menti guida
A li biddizzi arcani;
Nni teni vivi e sani ..
Lu sulu ajuto sò,
 
5
Si mai sintisti affettu,
O Zefiro amurusu,
Lu velu suspittusu
Allarga un pocu cchìù,
 
E si lo to nun basta
Alito dìlicatu,
Pigghiati lu me ciato,
E servitinni tu.
 
 
Giovanni Miele