Lo guarracino

Lo guarracino che ieva pe' mmare
lle venne voglia de se nzorare.
Se facette no bello vestito
de scarde de spine pulito pulito
co na parrucca tutta ngrifata
de ziarelle mbrasciolata
co lo sciabo'scolla e puzine
de ponte angrese fine fine.
Cu li cazune de rezza de funno
scarpe e cazette de pelle de tunno,
e sciammeria e sciammerino
d'aleche e pile de voje marino,
cu buttune e buttunera
d'uocchie de purpo, secce e fera,
fibbia, spata e schiocche ndorate
de niro de secce e fele d'achiata.
Ddoie belle cateniglie
de premmone de conchiglie,
nu cappiello aggallonato
de codarino d'aluzzo salato
tutto posema e steratiello,
jeva facenno lo sbafantiello,
gerava da ccà e da llà
la nnammorata pe' se trovà.

La Sardella a lo barcone
steva sonanno lo calascione;
e a suone de trommetta
jeva cantanno st'arietta:
«E Ilare' lo mare e lena
e la figlia d' 'a si' Lena
ha lassato lo nnammorato
pecché niente l'à rialato».
Lo guarracino 'nche la guardaje
de la Sardella s'annammoraje;
se ne jette da na Vavosa
la cchiù vecchia maleziosa;
l'ebbe bona rialata
pe' mmannarle la mmasciata;
la Vavosa pisse pisse
chiatto e tunno nce lo disse.
La Sardella 'nch' 'a sentette
rossa rossa se facette,
pe' lo scuorno che se pigliaje
sotto a nu scuoglio se 'mpizzaje;
ma la vecchia de la Vavosa
subito disse: «Ah schefenzosa
De sta manera nun truove partito
ncanna te resta lo marito.
Se aie voglia de t'alloc
tante smorfie nun aie da fà;
fora le zeze e fora lo scuorno,
anema e core faccia de cuorno».

Venimoncenne ch' 'a lo rommore
pariente e amice ascettero fore,
chi co' mazze, cortielle e cortelle,
chi co' spate, spatune e spatelle;
chisto co' barre, chille co' spite
chi co' ammennole e chi co' antrite,
chi co' tenaglie e chi co' martielle,
chi co' torrone e sosamielle.
Patre, figlie, marite e mogliere
s'azzuffajeno comm' 'a fere.
A meliune correvano a strisce
de sto partito e de chillo li pisce.
Che bediste de sarde e d'alose!
De palaje e raje petrose!
Sàrache, dientece ed achiate,
scurme, tunne e alletterate!
Pisce palumme e piscatrice,
scuorfene, cernie e alice,
mucchie; ricciòle, musdee e mazzune,
stelle' aluzze e storiune,
merluzze, ruòngole e murene,
capodoglie; orche e vallene,
capitune, aùglie e arenghe,
ciefere, cuocce, tràccene e tenghe.
Treglie, trèmmole, trotte e tunne,
fiche, cepolle, laùne e retunne,
purpe, secce e calamare,
pisce spate e stelle de mare,
pisce palumme e pisce martielle,
voccadoro e cecenielle,
capochiuve e guarracine,
cannolicchie, òstreche e ancine,
Vòngole, còcciole e patelle,
pisce cane e grancetíelle,
marvizze, màrmure e vavose,
vope prene, vedove e spose,
spinole, spuònole, sierpe e sarpe,
scàuze, 'nzuoccole e co' le scarpe,
sconciglie, gàmmere e ragoste,
vennero nfino co' le poste,
Capitune, sàure e anguille,
pisce gruosse e piccerille,
' ogne ceto e nazione,
tantille, tante, cchiù tante e tantone

Quanta botte, arrassosia
Cche se dèvano, mamma mia
A centenare le barrate
A meliune le petrate
Muorze e pizzeche e beliune
A delluvío te secuzzune
Nun ve dico che bivo fuoco
se faceva pe' ogne luoco
Te, tte, tte, ccà pístulate
Ttà, ttà, ttà, llà scoppettate
Ttù ttù, ttù, ccà li pistune
Bù, bù, bù, llà li cannune
Ma de cantà sò già stracquato
e me manca mo lo sciato,
sicché dateme licenzia,
graziosa e bella audienzia,
nfì che sorchio na meza de seje
co' salute de luje e de leje
ca se secca tu cannarone
sbacantannese lo premmone.

 (ignoto del sec. XVIII)