|
|
|
Matùzza era ‘na fìgghia divòta e rispittùsa, di nòbbili famìgghia putenti e ginirùsa.
Dû metri di figghiòla, dû metri î cannilèra, cugghìa la curniòla ‘llungànnu la branchèra.
Grifùni ‘u Saracìnu scinnènnu pi ‘dda costa, ‘a vitti ‘nto giaddìnu e si muntàu la testa.
- Quantu sî bedda Mata! Ti vògghiu maritàri; ‘dd’ucchiùzzi di ‘na fata sû fatti pi ‘ncantàri-.
Ma ‘ddu giganti era conquistatùri stottu, la societàti intèra si lu ‘nzunnàva mottu.
- O canci la tô sorti o ccà non hai spiranza, pi fàrimi la corti ti manca la climenza-.
‘U Saracìnu indòmitu addivintàu cchiù niru, arrèti di ‘ddu mònitu pigghiàu un gran rispìru,
ci dissi: - Abbàda Mata di non stiràri ‘u spagu, sinnò ‘nta ‘sta cuntràta di sangu fazzu un lagu-.
Ma ‘u spagu si rumpìu picchì cuntrariàta Mata si nni trasìu e û bannunàu ‘nta strata.
Chiddu si la pigghiàu p’offìsa a la pussànza, e ‘a genti assicutàu cu ogni priputenza.
Tirrùri p’i piccìtti dulùri p’i cchiù ranni, e ‘u ciàuru d’a motti rignàva a tutti ‘i banni.
Intantu cu ‘dda Mata si misi a camurrìa, e ogni matinàta passànnu pi ‘dda via:
- O Mata ch’a’mu a fari?- vuciànnu ci dicìa - Í ‘mmazzu a tutti pari si non mi pigghi a mia-.
Mata ch’avìa ristàtu ‘nto cori camuliàta, p’u Saracìnu amàtu prigàva ‘a ‘Mmaculàta:
- Ti pregu Madunnùzza dacci lu sentimentu, faccìllu a ‘sta Matùzza ‘sta gràzia, ‘stu purtentu-.
C’u sapi quali Diu si vosi scomodàri, ma a chiddu ci passàu ‘a vògghia di strafàri.
Addivintàu climenti un omu tuttu cori, e Mata finalmenti s’u vosi maritàri.
Ci fu ‘na festa ranni d’u munti a la marìna, e c’u passàri ill’anni funnàrunu Missìna.
Iammàru tanti scoli, giaddìni e palazzùni, e àppiru figghiòli ‘dda Mata e ‘ddu Grifùni.
Walter Ignazio Preitano
cannilèra: carro monumentale usato in processioni sacre; in dialetto viene usato con il significato di alto e longilineo. curniòla: qualità di uva con gli acini a forma di corno. La sua produzione avviene in alti pergolati. la branchèra: le branche; nella fattispecie le braccia. stottu: storto, di pessimo carattere. ‘nzunnàva: sognava. la tô sorti: il tuo modo di essere. pussànza: la forza, il potere. assicutàu: inseguì, perseguitò. a camurrìa: insistente. camuliàta: tarlata, intaccata. funnàrunu: fondarono. Iammàru: dettero vita, costruirono.
|
