|
Lu pisci russu
Una vota si cunta e si riccunta ca cc’era un marinaru, vecchiu, affamigghiatu e figghiu di la mala furtuna.
'Na jornata li picciriddi chiancìanu di la fami, la mugghieri era ntra un funnu di lettu, ed iddu ca mancu putia stari a l’addritta.
Si nn’ha jutu a lu mari.
- O furtuna scilirata, ca mi vai sempri a travirsari, ca m’hai livatu la
vita, ed ora mi stai sminuzzannu lu cori muddichi muddichi! O furtuna mmaliditta,
arricoghimi a lu funnu di stu mari!
E tuffiti, si jittau a testa appuzzuni ntra l’cqua.
- Chi è, chi fu? – Un pisci russu si l’ha misu supra lu schinu
e lu porta supra ’na scugghiera.
- Vattinni, - cci dici
- Poviru marinaru, ca la furtuna è cu tia;
sattìnni prufittari e di quantu ricchizzi havi lu mari su tutti toi.
Ddocu finiu, e di pisci chi era addiventà na bedda giuvina, un ancilu cu li capiddi d’oru,
ca era la Sirena di lu mari. Dipoi a lu marinaru cci dici:
- Sentimi, o marinaru, si voi li ricchizzi chi ti dissi, veni ccà ogni
matina all’arba: porta cimeddi ’ e riti, e po’ mi chiami e mi dici tri
voti:
O Sirena di lu mari,
Pottami pisci rari,
Ca eu vegnu di matinu
Pri piscari di cuntinu.
La Sirena turnao pisci russu e si sammuzzau ’ntra un fallanti.
Lu marinaru cala riti e
cimedda, e ’ntra un nenti si carricau di li megghiu pisci chi cci sianu, ca li vinniu
un tisoru.
Accussi ogni matina, prima d’arrispigghiarisi l’acidduzzi, iddu era
a lu scogghiu; chiamava tri voti la sò Sirena, e idda in forma di pisci russu cci purtava
li pisci li cchiù riali e magnifichi: e doppu tanti anni di jiri e viniri di sta manera,
senza cissari mai, lu poviru marinaru addivintau lu cchiù riccu di terri, palazzi e
dinari chi mai cci avia statu a chjddi parti, e
Arristau filici e
cuntenti,
E nui ccà senza di nenti.
Borgetto
www.colapisci.it
|
