Altre versioni:
Cantalanotti, Cantalumatinu

Giufà e lu Cardinali

Si riccunta e cc'era 'na vota e cc'era Giufà. Sò matri 'na jurnata, pi scapularisillu di supra li costi cci dissi:
- Vattinni a caccia, va' pigghia un cardidduzzu.

Pigghiasi la scupetta, camminannu:
- E quali sunnu li cardiddi, matri ? jeu 'un li canusciu..

- O bestia! mancu sai quali sunnu li cardiddi? sunnu chiddi chi hannu la testa russa!

Giufà si ha pigghiatu la scupetta e si 'nn' ha jutu a caccia fora li porti. Camina e camina, arriva 'nta 'na chiusa, e ddà a cu' vitti? vitti a un Cardinali chi stava passiannu. Comu cci vitti la cuppuletta russa 'n testa, dissi:
- O chi beddu cardidduni! - buhm! e cci tirau 'na scupittata.

Lu poviru Cardinali agghiummuniau senza diri ciu; Giufà allura tuttu contenti s'acchiappa 'n coddu lu cardidduni e ammutta a jiri 'n casa. Comu arrivau a la casa, si misi a fari un sassinu:
- Matri, matri, scinniti chi jeu suli nu' lu pozzu acchianari lu cardiddu; è veru grossu.

Sò matri, comu 'ntisi accussi, jisau li vuci:
- Mischina mia! sa chi fici.... sa chi successi!... - e pi la prescia si sdirrùpa scala scala.

Quannu va pi vidiri, ci vinni quaramai un motu:
- Comu facisti! arma scilirata, a cu' ammazzasti? ora ti mànnanu a la furca.... e mori... e jeu arrestu sula mala scunsulata!...com'hé fari?...ah chi figghiu mi misciurtiau!..

E la povira matri si pidduliava tutta, s'ammazzava tutta. Giufà, alluccutu, alluccutu, all'ultimata cci dissi a sò matri:
- Ora, matri, m'aviti a diri chi su' sti specii chi faciti; nunca doppu chi mi dicistivu di jiriminni a caccia, e di pigghiari un cardiddu cu la testa russa, e jeu tuttu chistu I'haju fattu, viju chi stati facennu comu 'na fera, e vuliti a centu chi vi tennu

- Vattinni, erva vili, mancia persa, arma dannata; comu ému a fari ora cu stu mortu?... unni l'urvicamu!?... oh chi tusciu chi m'avvinni!

E la povira matri 'un si dava paci e chiancía a larmi di sangu.

- Nenti, matri mia, vossa 'un si scanta, cci dissi Giufà, ora lu jettu 'nta lu puzzu e cci jettu 'na pocu di petri di 'n capu e 'un si nni parla cchiu.

Accussi fici Giufà; pigghiau lu mortu, lu jittau 'nta lu puzzu e poi cci lassau jiri di 'n capu 'na quantità di mazzacani e di cuti. Poi cci vinni 'n testa di jittaricci un crastu mortu e supira di lu crastu n'âtra pocu di petri grossi e giachi, chi lu puzzu quaramai si jinchiu.
Doppu chi s'allistiu, chi pensa!?.. pensa di jiri nna lu Judici e cci cunta chi 'nta lu puzzu di tu sò curtigghiu cc' era jettatu un Cardinali mortu. 
Lu Jùdici sapennu cu' era Giufà cci dissi ridennu:
- Vattinni va, pezzu di malunatu, va vidi soccu ha' a fari, va.

Ma vidennu lu Judici ca Giufà 'un si nni vulia jiri, e dicia sempri:
- Vossa camina, vossa camina - dissi 'ntra d'iddu

- Cosa cc'è? - Chiamau 'nu pocu di sbirri, e tutti 'nsemmula jeru 'n casa Giufà.

Arrivati chi fòru, ltu jùdici cci dissi a Giufà:
- Scìnnicci tu stessu 'nta lu puzzu e videmu soccu cc'è.

Giufà vagghiardu a scinniu 'nta lu puzzu e di ddà jusu cci dissi a lu Judici:
- Signuri judiici, l'acqua petri addivisitau, e lu mortu è sutta li petri.

Allura li sbirri abbuscaru 'na corda e 'na coffa e si misiru a tirari li petri chi Giufà cci pruija. Doppu un beddu pizzazzu, Giufà si misi a gridari di ddà jusu:
- Me' signuri, me' signuri, a lu Cardinali li corna cci nasceru.

Lu Judici si misi a ridiri, e cu' 'na magnità la cchiù granni chi mai cci dissi:
- 'Un ti nn 'ncarricari, secuta a livari petrì - e Giufà sicutava a livari petri. Quannu lu crastu fu tuttu scummgghiatu di li petri Giufà chiamau arrè:
- Signuri iddu crastu è.

Lo Judici allura ci arrispunniu:
- Acchianatinni, pezzu di birbantunàzzu; haju vistu quntu si' loccu; un'âtra vota 'un ti arrisicari di fari sti cosi, sai! va' travagghia e va' buscati lu pani senza 'ncuitari a nuddu e vasinnò ti fazzu attaccari e ti fazzu mettiri a lu casteddu.

Giufà arristau comu un minnali, lu judici e li sbirri si nni jeru, e la poviva matri di Giufà tutta cugghiuta cugghiuta, riscialau chi so figghiu si la scapilau comu vosi Diu.