Giufà e la ventri
lavata
![](immagini/giufaelavintrilavata/GiufaBrancaforte.jpg)
Brancaforte
Ora la matri di
Giufà 'n vidennu ca cu stu figgiìiu 'un cci putía arrèggiri, lu misi pi picciottu di
Tavirnaru.
Lu tavirnaru lu chiamau:
- Giufà, va a mari, e va lava sta ventri, ma bona lavala, sai!
masinnò abbuschi
Giufà si pigghiò la ventri e iju a ripa di mari. Lava, lava; ddoppu
aviri lavatu 'na matinata, dissi:
- E ora a cu' cci spiju s'è bona lavata?
Nta stu, mentri s'adduna d'un bastimentu chi stava partennu; nesci un
muccaturi, e si metti a li marinara, e a chiamalli:
- A vui! A vui! Viniti ccà! Viniti ccà
Lu capitanu si nn'adduna e dissi:
- Puggiamu, picciotti, ca cu' sa chi nni scurdamu 'n terra...
Scinni 'n terra, e va nni Giufà. - Ora chi cc'è?
- Vassia mi dici: E' bona lavata sta ventri?
Lu capitanu unu era e centu si fici; afferra un pezzu di lignu e cci
li sunau boni boni.
Giufà chiancennu cci dissi:
- Unca com'hè diri ?
- Ha' a diri, cci arrispunìu lu capitanu: - Signuri,
facitili curriri. E accussì nn'accanzamu lu tempu ch'àmu persu
Giufà cu li spaddi beddi càudi, si pigghia la
ventri e sferra pi 'na campagna, dicennu sempri:
- Signuri, facitili curriri ! Signuri,
facitili curriri!
'Ncontra a un cacciaturi ca tinia di fittu du'
cunigghia. 'Ncugna Giufà:
- Signuri, facitili curriri! Signuri,
facitili curriri
Li cunigghia
scapparu.
- Ah! Figghiu di scarana! macari tu mi nn'ha' a fari
? - cci dici lu cacciaturi, e cci chianta di manu a culazzati di
scupetta.
Giufà chiancennu chiancennu cci dici:
- 'Unca com'hè diri ?
- Comu ha' a diri ?
- Signuri facitili ocidiri!
Giufà si pigghia la
ventri e java ripitennu zoccu avía ai diri. Scontra, e scontra a dui chi si
sciarriavanu. Dici Giufà:
- Signuri, facitili
ocidiri!
- Ah 'nfamuni! puru tu attizzi! - dicinu chisti
dui; e lassanu di sciarriàrìsi e chiantanu di manu a Giufà.
Poviru Giufà arristau cu la scuma a la vucca, e 'un
putia cchiù parrari. Ddoppu un pizzuddu, dici sugghiuzziannu:
- 'Unca com'hè diri?
- Comu ha' a diri ? - cci arrispunninu iddi - ha'
a diri: - Signuri, facitili spàrtiri!
'Nca, Signuri, facitili spàrtiri, accuminzò a diri
Giufà; Signuri, facitili spàrtiri. E java caminannu cu la ventri 'mmanu e sempri dicennu
la stissa canzuna.
Caminannu caminannu, a cui 'ncontra? a du' picciotti
ca niscìanu di la Chiesa maritati allura allura; comu sentinu:
- Signuri, facitili spàrtiri ! Sìgnuri,
facitili spàrtiri! - curri lu zitu, si sciogghi la cintura e, tiritighi e
tiritanghi supra Giufà dicènnucci:
- Aciddazzu di malagùriu! ca mi voi fari
spàrtiri cu mè mugghieri i ...
Giufà 'un ni putennu cchiù si jittò pi mottu. Li
parenti di li ziti 'ncugnaru pi vidiri si Giufà era mortu o vivu. Ddoppu un pizzuddu
Giufà arrivinni e si susiu. Cci dìcinu li genti:
- 'Unca tu accussì cci avivi a diri a li ziti ?
- E comu cci avia a diri ? - cci addumanna Giufà.
- Cci avìvi a diri: - Signuri, facitili
ridiri! Sígnuri , facitili ridiri!
Giufà si pigghiò la ventri e si nni turnò a la
taverna. Passannu di 'na strata, cc'era 'nta 'na casa un mortu cu lì cannili pi davanti,
e li parenti chi chiancìanu a chiantu ruttu. Comu sentinu diri a Giufà:
- Signuri, facitili ridiri! Signuri,
facitili ridiri! - zoccu ccì avianu dittu chiddi di lu zitaggiu - ci
parsi 'na cosa fatta apposta; nesci unu cu un marruggiu, e a Giufà cci nni detti pi iddu
e pi àutru.
Allura vitti Giufà ca lu megghiu era di zittìrisi e curriri a la taverna.
Lu tavirnaru comu lu vitti cci detti lu restu, ca
l'avía mannatu cu la matinata, e s'arricugghiu 'n versu vintitrì uri; e poi cci detti la
coffa.
Palermo
trascritto da Giuseppe Pitrè
in Fiabe, novelle e racconti popolari siciliani
![](servizio/home-nof.jpg)
www.colapisci.it
|