La ricetta in versi di Gianni Argurio - ©

Pasta 'ncaciata

Nta 'na bedda cassarola mittiti
l'ogghiu d'aliva e la carni 'i maiali,
nzemi 'a cipudda e l'accia ci junciti
puru 'na carota tantu nun fa mali.

Facìti rusulari a focu lentu,
poi ci mmscati lu capuliatu
girati e rigirati pu 'nu mumentu
ccussì e lu pumadoru già passatu.

Lu sali e pipi sempri su vuliti
e tri bicchieri d'acqua pì cuprìri
la carni e finu a quannu la ssaggiati
s'è cotta ma s'annunca pò ndúrìri.

Niscìti 'a carni e a mmossa la tagghiati,
ffiddiati puru l'ova già bugghiuti,
poi 'i mulinciani fritti e riminati ...
furmaggiu e ccà sti cosi sù finuti.

Bugghìti 'a pasta cu l'attenzioni,
ô èssiri ntinìri e stannu attentu,
e ta 'na teglia sì a proporzioni
mittiti un solu 'i pasta e cunnimentu.

'Nsolu di zzucu e n'autru di pasta,
unu 'i furmaggiu e nnati giustannu;
forsi 'na teglia sula nun vi basta ...
e nun sapìti chi stati rifurriannu.

Lu furnu 'a èssiri a ducentu gradi,
la pasta menzuredda ciàvi a stari;
poi la niscìti e attenti 'n mi vi cadi ...
la tavula è stisa e putiti, manciari.

Gianni Argurio

www.colapisci.it