La ricetta in versi di Gianni Argurio - ©

Spaghetti mmddicatu c'anciovi

Pigghiati 'na patedda o 'na pignata
e ci mittiti l'ogghiu e la cipudda
facènnula suffrijril, ndurata,
calati l'anciovi e pumaduredda.

Facìti còciri deci minuti,
juncìti pipi e sali quantu basta,
ssaggiati si sti cosi sú cunnuti
e li mittiti nta pignata 'i grasta.

Frijti 'na picchitta la muddica
grattata fina, fina e misa 'i parti,
ccussì pruvati sta ricetta ntica
chi pì sapuri nuddu mai la batti.

Menti pì mia, bugghiti 'u spaghittinu
nta l'acqua e poi a lu denti raccumannu,
sculàtili e faciticci l'inchìnu...
mentri 'i cunzati senza truccu e ngannu.

Bullaticci 'a muddica e rigirati
lu tuttu nta padedda e supra ò focu;
furmaggiu e poi a tavula 'i purtati...
pì cu' si mancia sunnu sempri pocu.

Gianni Argurio

www.colapisci.it