|
|
|
Pisctoccu a la iarrusa
-‘Nta ‘stati ch’a calùra nni scummìna e ‘a ghiotticèdda nni iettirìa pisanti, non ci facèmu tortu a la cucìna, ch’u nanu ‘a fantasìa lu fa giganti.
P’avìri piscistòccu ‘nta mê casa, essennu mê mugghièri sfiziùsa, ci scammintài, p’amùri d’a mê spusa, ‘i “pètali di stoccu a la iarrùsa”.
Non c’è bisognu ‘i crita e terracòtta, t’abbasta ‘na patèdda pi ‘stu ciùri; comu ti dissi chista non è ghiòtta ma fa parìgghia pi ciàuru e sapùri.
Accàtta pisci comu p’a ‘nzalàta e làssilu ‘ntall’acqua chi ci scurri; e ora, si ssî bedda arripusàta, parràmu dill’odùri e di li ferri.
‘Na cipuddùzza senza sparagnàri, ‘na pocu d’àccia e un peti ‘i putrusìnu, dùdici chiappirèddi, a isaggiràri, e un quartu ‘i pipicèddu canarìnu.
Di chissu cchiù d’un quartu non nni pìgghia ch’annunca suprarìgghia ‘nto sapùri; e ora chi ssî pronta ‘ntall’odùri, c’a menza luna fanni ‘na puttìgghia.
Ògghiu, fucùzzu allègru e menti sbìgghia anfina chi ti pari a puntu giustu, ‘na pocu ‘i concentratu, ma ‘na scàgghia, pi culuràri e ci ‘ncagnàri ‘u gustu,
e sali e pipi quantu ti nni senti pi non ci fari sconzu a li parenti. Pìgghia ‘ddu pisci e fallu ‘nzapuràri ‘nta ‘ssu suffrìttu chi sapìsti fari.
‘Sta vota miscitìa c’un cucchiarùni, e iddu sfògghia comu a ‘na rusàra, cummògghia tutti cosi e pìgghia cira, ma ogni tantu smovi e ti n’addùni.
Comu riddùci l’acqua chi muddàu, sminùzzicci tri quattru pomadòru, cchiù russi sû cchiù dùgnunu ristòru; cummògghia ancòra anfina chi cucìu-.
-E comu mi cunvìnciu di ‘ss’eventu? ‘U vaddu e mi ripassu ‘u paru e sparu?-. -‘U ‘ssaggi, bèdda! E si non è ‘u mumentu, acqua e fuchìttu. Mi pari tuttu chiàru!
Quannu ti pari tènniru abbastanza, leva ‘u cummògghiu e facci fari ‘u quàgghiu; s’i dosi foru chiddi ‘i ciccustànza, a paru di lu pisci assumma l’ògghiu.
Chiussài di chistu non ti vògghiu diri, p’u restu è l’esperienza chi cumànna. Si di ‘stu pisci cchiù nni vôi sapìri, a vacci a dumannàri a ‘n’àutra banna.
Walter Ignazio Preitano
|
.jpg)
